Me kënaqësi ju informojmë se kemi filluar zbatimin e programit “Rrjeti i Qendrave Burimore të Malit të Zi”. Programi zbatohet nga Qendra për Zhvillimin e Organizatave Joqeveritare (CRNVO) në partneritet me Qendrat Rajonale të Burimeve dhe zyrat lokale – OJQ Novi Horizont (Qendra Rajonale e Burimeve Jug), OJQ Qendra Demokratike Bijelo Polje (Qendra Rajonale e Burimeve Veri), OJQ Aktivna Zona (Qendra e Resurseve Rajonale për Rajonin Qendror), OJQ Natura Kolašin, OJQ Bonum Pljevlja si dhe OJQ Nada Herceg Novi.
Programi zbatohet me mbështetjen e Ministrisë së Zhvillimit të Investimeve Rajonale dhe Bashkëpunimit me OJQ.
Kjo fazë e Qendrës Burimore është një hap i rëndësishëm për Malin e Zi, duke pasur parasysh se puna e qendrave burimore tani financohet për herë të parë nga shteti i Malit të Zi. Ky është një nga aktivitetet e parapara në Strategjinë për bashkëpunim ndërmjet organeve të administratës shtetërore dhe organizatave joqeveritare 2022-2026. Në këtë mënyrë shteti ofron mbështetje të vazhdueshme dhe të qëndrueshme për punën e përditshme të organizatave joqeveritare, duke mundësuar rritjen dhe zhvillimin e tyre, gjë që në fund do të sjellë përfitime për shoqërinë në tërësi.
Dëshirojmë të theksojmë se qendrat burimore ofrojnë një sërë shërbimesh në baza ditore për organizatat joqeveritare, organet qendrore dhe lokale, si dhe qytetarët e interesuar në të gjitha çështjet që kanë të bëjnë me organizatat joqeveritare: konsulencë ligjore dhe financiare, mbështetje në themelim, rritje të transparencës, informacion mbi mundësitë e financimit, mbështetje në organizimin punës së mbrendshme të organizatës, pjesëmarrje në vendimmarrje publike, grupet e punës, gjetja e partnerëve dhe shumë të tjera.
Përveç shërbimeve të përditshme, Qendrat Burimore gjithashtu u ofrojnë mundësinë organizatave joqeveritare të marrin pjesë në një sërë trajnimesh që synojnë të aftësojnë organizatat për të ofruar përfitime maksimale për shoqërinë përmes punës së tyre: shkrimi i projekteve për fondet vendase dhe ato të BE-së, trajnim për menaxhimin financiar, marrëdhëniet me publikun dhe menaxhimin e rrjeteve sociale, mbledhja e fondeve, monitorimi i politikave publike dhe shumë të tjera. Përveç kësaj, organizatat joqeveritare mund të përdorin ambientet e qendrave burimore për organizimin e trajnimeve, punëtorive, takimeve, konferencave për shtyp dhe ngjarjeve të tjera.
Qendrat Burimore do të vazhdojnë gjithashtu të inkurajojnë organizatat në zhvillimin e shoqërisë civile në Mal të Zi, përmes një sërë studimesh që do të na ofrojnë të dhëna si bazë për marrjen e vendimeve të duhura. Së fundi, përmes një sërë takimesh konsultative në nivel kombëtar dhe rajonal, do të kemi mundësinë të nxisim diskutimin mbi gjendjen e shoqërisë civile në Mal të Zi dhe të trajtojmë temat aktuale me rëndësi për organizatat joqeveritare.
